ГIулин каникулар

Магьа хъучучIуне мактабарин ке ирхе каникулар. 9, 10 классар кидавай, мебрис мехIелди экзаменар аме, сае классарис 1-пе июньдихъас мич хъучучIуна ая гIулин каникулар. Шиникквар ппара Iайи гъузуна аве ме вахттунихъ.

Джалла каникуларикес ке Iайи кканеф гIулин каникулар э. Фас пучин? Сад пеф, джалла каникуларилас ке ирхе каникулар идехIела. Iуд пеф, са классинди шиникквар хIа ве. Хьибуд пеф, ме каникулари шиникквар найч хьунара ве. Дадар бабари кьасустти гIулана гъуланде курарилас отпускар шиникквар фай найч хьунара вес.

Са ппараттар хIуьларихъди ве, сур джуре хIуькуматариди ве, амма ке ппара вереф шагьурариъ аяттар хIабабарихъдина хIададарихъди хIурариди. ХIабабара гъузуна аве мус рукьасехьен агъай хуттулар. ХIабабари е алурхIандава, алтухъ даккан аркьайдава, са чIалалди гIентIи вардиш аркьа. Шиниккваринра ве хIа ягъ.

ХIуриъ шиниккварис акьуная парк, ая батIар сарин гьава, мертте уха хьед, ширин якк, хIекьдан некк. БатIар чIирар, хье дагьарар, дарар, сурар, уникIер, уриар, фи кканчира ая. Амма са кар иджи адава хье. НецIв тахIурди ая. ГIихьуна джаллабри отводар барбатI акьуная хьин хье нецIв. ДехIела авала суман фатас вей андава шиникквар йаIар ахъас.

Хумбарис ра идже вейи файшуна халича, кьвадилкьван Iуьччуна, рукъасра акьуна фай вейи. ГIул хъучучIуф джемеIет хъаверефи нецIварихъ. Шагьурариас ади шиникквар джурейи гIаттаркуна ягIарве. Амма хIурариъ ая шиниккварис кканвейдава кканиккулари экьвас мисариъ, мебурис кканве шагьурдиди вес. Са чIалалди иджи ая тисаъ, хьин адавусаъ.

Л. Гусукаева