Поздравление имама Кумторкалинского района Сардутдина-гьажи Казаватова с праздником Ураза-байрам

Ассаламу алейкум ва рагьматуллагьи ва баракатугьу!

Аявлу къардашлар ва къызардашлар!

Къутлайман сизин, Яратгъаныбыз Аллагь бизге рамазан айны гёрюп, ону ичинде гьар тюрлю яхшы ишлер этмеге имканлыкъ бергени ва энни Ораза-байрам сююнмеге болангъанлыкъ булан. Шону булан бирче Есибиз Аллагьгъа жамият ораза ачывлар – ифтарлар, садагъа оьлешивлер, таравих намазлар къылмагъа болгъаныкъ саялы макътав этемен. Бу ва оьзге ниъматлар саялы Яратгъаныбызгъа даим ва дазусуз маъктавлар этмек нече де агьамиятлы, биз гьали-гьалилерде шо яхшылыкъланы кёбюсюнден къуру къалгъан эдик чи.

Олай да, Есибизге этеген гьар гюнлюк шюкюрлюкден къайры, яхшы ишлерибизни дагъыдандагъы юрютмеге чакъыраман. Рамазан айда болгъан чакъы кёп Къуръан охуй, ювукъ адамларыбызгъа кёмек эте, садагъа оьлеше эдик. Энниден сонг да шо яхшы амалланы къоймай, артын узатайыкълар. Рагьмулу Аллагьдан Оьзю сюймейген ишлерден сакъланмакъгъа бизге гюч ва чыдамлыкъ берсин деп тилейбиз, неге десе байрамны маънасы – гери урулагъан ишлерден сакъланмакъ ва Ону разилигин къазанмакъ.

Ораза тутувдан уллу шабагъатлар, Аллагьдан къоркъув, напсдан уьст гелив ва бу дюньялыкъны леззетлерине алданмай сакъланмагъа болув булан етишмеге болур. Гьакъ герти насипликге Сыйлы Къуръанны калимасына ва Пайхаммарны (салляЛлаху алейхи уа саллям) сюннетине гёре юрюйген инсан лайыкълы болур. Гьюрметли къардашлар ва къызардашлар, Есибиз Аллагьдан рамазан айдагъы бизин бары да яхшы ишлерибизни, олай да ораза тутгъаныбызны, секет тёлегенибизни ва таза негет булан этилген оьзгелени къабул этсин деп тилейбиз. Бары да яхшы амаллар учун этилген ишлеригизге ва себеплеге гёре этип болмагъанлагъа да Есибиз Аллагь шабагъатын артдырып, къошуп берсин! Барыгъызгъа да Яратгъыныбзны рагьмулугъу, яхшылыкъ, берекет ва эки де дюньяда насип болсун деп ёрайбыз.

Амин